A Xunta só mobilizou o 10 por cento do investimento.

Fai un ano que o conselleiro de Economía e Industria, Javier Guerra presentaba en A Laracha un plan para revivir a Costa da Morte que tiña previsto mobilizar uns 70 millóns de euros en investimentos, dos cales a Xunta de Galicia tiña previsto aportar uns 25 millóns de euros.

“O Plan Revive” foi presentado “a bombo y platillo”, e recollido nos medios. Pero un ano despois os obxectivos non parece que se acadaran. Guerra afirmaba entón que o plan era “un exemplo de colaboración transversal para apoiar proxectos solventes que sirvan para reactivar a economía das comarcas da Costa da Morte”.

Segundo o voceiro de Economía do Partido Socialista, José Luis Méndez Romeu o Plan Revive só mobilizou un 10 por cento do marco financieiro de investimento previsto. Ao parecer ese dato foi corroborado polo responsable do Igape, Javier Aguilera.

A media de axuda por empresa foi de 20.000 euros. Desde o PSOE salientan “as considerables dificultades que está a demostrar o goberno galego na execución lenta e insuficiente deste plan, que mesmo ten dado por paralizado 9 meses despois da súa posta en marcha”.

Méndez Romeu pediu máis eficiencia e menos propaganda e dixo que as empresas “quéixanse dun descoñecemento absoluto dun Plan que consideran un fracaso que non ten desenvolvido iniciativas coñecidas nin encetado as axudas prometidas”.

Séguenos en Twitter @anosacosta

FOTO DA PRESENTACIÓN DO PLAN O 16/FEBREIRO/2011