O BNG critica a xestión do campo de fútbol de Caión

“Temos un goberno chapuzas, trapalleiro e despilfarrador, ademáis de manipulador” asegura o voceiro nacionalista na Laracha que confirma que “o campo de fútbol de Caión non poderá ser construido nos terreos que foron expropiados polo concello”, despois de que o propio executivo recoñecera que o Plan de Ordenación do Litoral non permite que se leve a cabo esta infraestrutura, e teña que buscarse outra ubicación.

Xoán Manuel Sande lembra que “foi o PP quen deixou a Caión sen campo ao asinar un convenio coa Confraría de Pescadores e recalificar os terreos no PXOM para permitir a construcción de 60 apartamentos de luxo onde estaba o Campo da Ínsua”. Uns apartamentos que nunca se chegaron a edificar. “Lembremos que o Sr. Alcalde está imputado, ante as denuncias presentadas por esta recalificación urbanística que deixou á vila de Caión sen campo de fútbol” engaden os nacionalistas.

Desde o BNG lamentan que a Xunta aprobara “un millón de euros” para a construcción dun novo campo, pero as directrices do POL impediron que se fixera realidade. ¿Por que non presentou alegacións o concello da Laracha ao Plan de Ordenación do Litoral? pregúntanse.