“O tesouro da corsaria” presentouse en Santa Comba.

A libraría Ler de Santa Comba, que dirixe Isabel Ares, acolleu a presentación do libro “O tesouro da corsaria”, de Rafael Lema. No acto estiveron presentes o candidato a alcaldía de Santa Comba polo PP, Antonio Landeira e mailos concelleiros socialistas José Antonio Ucha(candidato ademáis do PSOE) e Ángel Souto.

A presentación correspondeulle o segundo tenente de alcalde xalleiro, o avogado Jacobo Amarelle Barreiro. Amarelle destacou o traballo de investigación do libro “que serve para que coñezamos mellor a época na que se desenvolve, e de gran trascendencia para a historia futura do país, no marco dunha triloxía corsaria na que o autor nos deixa unha nova xoia na literatura de aventuras”.

Amarelle e Lema tamén destacaron nas súas alocucións a presencia dos arrieiros do Xallas no acarreo e comercio entre a costa galega desde o século XVI ata o século pasado. “O tesouro da corsaria” é a parte final dunha triloxía de aventuras mariñas protagonizadas polo corsario de Camariñas da época napoleónica Ambrosio Álvarez Pardiñas, persoeiro real dono do bergantín La Constancia de Galicia con base en Veracruz, tras a publicación de Capitán Araña e Crónicas Corsarias.

Como explicou o autor “Nesta ocasión, o capitán Pardiñas xúntase cunha muller pirata apátrida, de orixe galego-catalán, Sofía Rivas alias A Catalana, para iren polo tesouro dunha famosa pirata, Anne Bonney, nas costas de Norteamérica. A existencia de mulleres piratas e dun importante número de corsarios galegos entre 1770 e 1815 e outro dos aspectos que intenta destacar esta obra”.

O autor indicou que “Nesta xeira sufrirán batallas mariñas, asaltos, naufraxios, ciclóns, a traición, e veranse envoltos en escuras tramas políticas e relixiosas nun mundo envolto nas guerras napoleónicas no ano 1805, o ano de Trafalgar e da batalla de Fisterra, e no agromar dos movementos independentistas americanos”.