A adquisición do vehículo foi financiada integramente pola Deputación mediante unha subvención de 55.000 euros concedida ao abeiro do programa provincial de investimentos para a compra de vehículos destinados a entidades sociais.
A nova furgoneta permitirá realizar os desprazamentos das persoas usuarias ata o centro e ás diferentes actividades organizadas pola asociación en condicións de seguridade e adaptadas ás súas necesidades. Ademais, facilitará ampliar a capacidade de atención da entidade e ofrecer apoio ás familias que teñen dificultades para asumir estes traslados polos seus propios medios.
Durante o acto de entrega, o presidente da Deputación destacou o labor que desenvolve AFAFES na comarca da Costa da Morte no acompañamento e atención ás persoas afectadas por enfermidades neurodexenerativas. Tamén lembrou que a institución provincial mantén desde hai anos a súa colaboración coa entidade a través de diferentes liñas de subvención destinadas ao mantemento dos servizos, á contratación de persoal especializado, á adquisición de equipamento e ao desenvolvemento de programas de prevención da dependencia, promoción da autonomía persoal e rehabilitación.
AFAFES presta servizos de estimulación cognitiva e funcional, atención psicolóxica, rehabilitación, orientación ás familias e apoio ás persoas coidadoras, ademais de desenvolver actividades dirixidas á prevención do deterioro asociado a estas doenzas.
